ត្បូងឃ្មុំ៖ បន្ទាប់ពីបានបញ្ចប់ពិធីប្រគល់បង្គន់អនាម័យ ចំនួន ៥០ ជូនដល់លោកតា លោកយាយ និងបងប្អូនខ្មែរឥស្លាម រស់នៅក្នុងភូមិចំនួន៦ ស្ថិតក្នុងឃុំកោងកាង ស្រុកពញាក្រែក ខេត្តត្បូងឃ្មុំរួចមក នៅព្រឹកថ្ងៃទី១១ ខែធ្នូ ឆ្នាំ២០១៦ ដដែល លោក ណាសៀត អូស្មាន ប្រធានសមាគមសម្ព័ន្ធយុវជនមុស្លិមកម្ពុជា បានដឹកនាំយុវជនសមាជិកសមាជិកា អញ្ជើញសាកសួរសុខទុក្ខ គ្រួសារបងប្អូនខ្មែរឥស្លាមដែល កំពុងជួបការលំបាក មានជំងឺ និងទីទាល់ក្រ ខ្វះផ្ទះសម្បែងចំនួនបីគ្រួសារ រស់នៅក្នុងភូមិពោធិឥន្ទ ក្នុងឃុំខាងលើ។
ទី១ គ្រួសារលោក ឯល គ្រីយ៉ា ជាគ្រូបង្រៀន ដែលកំពុងមានជំងឺឆ្អឹងខ្នងធ្ងន់ធ្ងរ មិនអាចក្រោកពីកន្ទេលរួច ដើម្បីរកទទួលទានចិញ្ចឹមគ្រួសារបាន ហើយកំពុងសំរាកព្យាលនៅផ្ទះ។
ទី២ លោកយាយ ចាស់ជរា ពិការភ្នែក ឈ្មោះ អៃសះ រស់នៅយ៉ាងទុរគត់ម្នាក់ឯង។
ទី៣ គ្រួសារលោក ម៉ាត់ ឯល ដែលទីទាល់ក្រ បន្ទាប់ពីរូបលោកបានធ្លាក់ខ្លួនឈឺ មិនអាចបន្តរកស៊ីទទួលទានផ្គត់ផ្គង់គ្រួសារទៀតបាន។ បន្ទាប់មក ផ្ទះក៏ចាស់ទ្រុឌទ្រោម ក៏សម្រេចចិត្តរុះរើ សង់ខ្ទមនាំគ្រួសារជ្រកកោនបណ្តោះអាសន្នមិនមានពេលកំណត់ ដោយមិនមានលទ្ធភាពសាងស់ផ្ទះឡើងវិញ។
ដោយមើលឃើញពីទុក្ខលំបាក ជីវ:ភាពទីទាល់ក្រ លោកប្រធានសមាគម ក៏បានឧបត្ថម្ភថវិកាមួយចំនួន ជូនដល់គ្រួសារទាំងបីខាងលើ ដើម្បីដោះស្រាយជីវភាពរយ:ពេលខ្លី និងពិនិត្យមើលលទ្ធភាព ដើម្បីស្វែងរកជំនួយ ជួយសាងសង់ផ្ទះជូនគ្រួសារលោក ម៉ាត់ ឯល។